"STI ANI" POESIA DIALETTALE DI LIVIA MARCHESONI.

Ahh! Sti ani, sti ani… quante volte che i ne lo diseva, i nosi genitori.

Adeso ghel disen noi, ai nosi fioi propri come lori.

Quante robe e usanze che è cambià, da alora.

Da quando i nosi noni i feva filò sentadi su ‘n te na bora

Le none enveze, le se trovava dopo aver fini i so misteroti

Per laorar en tele solete o repezar braghe o calzoti.

I tosati i podeva zugar liberi e le so mame le ghe deva n’ociada dal pontesel.

Perché pasava sol qualche caro, tirà dan bò, dan caval o n’asenel.

I tosi, quando che ghe piaseva na tosa carina

I la spetava for de cesa, lavadi e petenadi, con na onta che pareva brilantina

Tute le stimane con el car pien de sachi, pasava el molinar for per la matina.

E quando che l’aveva masnà el portava ‘n drio semole e farina

Ogni tanto, pasava anca ‘l strazaro – sel sentiva da lontan en mezo a sta paze

‘L toleva su, pèl de cunei, fero vecio e straze.

De note, al paese che tendeva ‘l Criaore – el girava tute le strade

El controlava le linterne e se neva tuto ben, anca den per le contrade.

‘L formai, i lo feva qua al casel, chi che gaveva na vacota.

‘l boter i se lo portava a casa, ‘l dì che i feva còta.

I feva luganeghe e mortandele, quando i copava ‘n rugantel

Cossi i conzava i crauti, con do ossi, ‘n museto e trè scodeghe col pel.

Confronto a quela de ades, l’era na vita da poreti quela de alora

Però i girava tuti a testa alta co la so dignità e onor

Adeso, ‘n tel domili, gaven tante comodità.

Però,forsi, aven perso en po’ de paze e serenità.

Cossì lei la vita, lè na roda che gira, anca massa ‘n presa

E no se pol fermarla gnanca se se volessa.

Quanti valori umani, esperienze e tradizion che naria perso

Se gruppi come ‘l nosso no li tegnissa a man.

Per farli cognoser e tramandarli ala zente de ancoi e a quela de doman

Caldonazzo luglio 2000

Livia Marchesoni